《彌留之城》專題置頂

DKLM1002:香港市第一人民大學(University of Xianggang)舍堂迎新攻略

2018 年 07 月 30 日

文/錢堂友

親愛嘅Freshman BB:

仲記唔記得我哋年幾前嘅DKLM1001迎新攻略啊?時間過得真係快,又就快到我哋一年一度嘅迎新啦~上年我哋講過XGU嘅迎新攻略,不如今年就講吓大家都好關注嘅XGU舍堂迎新攻略啦!

點都好,開始之前都要循例同大家講返句「恭喜」,入到香港市最高學府,就梗係要唱通街,同晒啲親朋戚友講,等佢哋可以喺啲豬朋狗友面前打吓飛機啊嘛!但係講真,我點都覺得入XGU係一個好撚不智嘅行為,之前「圍堵校委會」單嘢都已經夠晒煩,不特止,舍堂醜聞出完一單又一單,報紙A1都講到明香大啲人「冇品」兼「幼稚」,但係你哋都夠薑入嚟,唔話你哋叻叻豬都唔得!

但係放心,我哋DKLM1002絕對唔會質疑同學入XGU嘅決心!無論外界講到我哋香大個朵幾咁差都好,我哋知道同學絕對唔介意外界對我哋嘅批評。離地啊嘛,香大不嬲都離地㗎啦~怕咩喎!同埋我知道好多Freshman BB都好想感受吓香大獨有嘅「舍堂文化」,所以今次呢個舍堂迎新攻略會幫大家破解香大舍堂迷思,同埋教大家點樣應對「舍堂教育」。

塗鴉弔唁冊 竟然仲有Hall住?!

唔知近排大家有冇聽過香大舍堂嘅迎新(Hall Orientation)醜聞,今次係一間喺沙宣道嘅紫Hall瀨咗嘢。嗱~老實講,迎新呢味嘢就真係「可遠觀而不可褻玩焉」嘅,都知道成班Freshman BB入到去就一定係被逼俾大仙玩㗎啦!但係大佬啊,你明知道Hall O啲Task好容易出事,就唔該做好啲Briefing,一係就瀨咗嘢嘅時候用群眾壓力制止單嘢唔好傳到全世界都知啦。住咗咁耐Hall都唔使我教啦,舍堂教育就係教你點樣瞞天過海、點樣以偏概全、點樣洗腦,然後令到班Freshman BB聽晒大仙話㗎嘛~你哋想pub起間hall都唔係用啲咁另類嘅宣傳手法㗎,而家搞到香大舍堂見晒報,講到我哋班香大學生低能兼冇品啦唉~

講返沙宣紫Hall單醜聞先,嗱~要學識點樣喺迎新生存,今次就係一件好好嘅事例啦!話說沙宣紫Hall喺2017年8月尾搞迎新,有日夜晚過緊NightTrack活動嘅時候,有兩個大仙指示個俾人矇咗眼嘅Freshman BB喺達安輝教授本弔唁冊上面寫咗句「你好嗎?可以除眼罩呀?」之餘,仲要寫埋自己個大名。噉咪弊囉~好寫唔寫,寫自己個名上去,噉都好難唔知你係邊個喎!?之後沙宣紫Hall就話係有堂友當晚發現件事之後主動噉同返當時嘅迎新OC講,班迎新OC又真係即時同舍監兼舍堂導師匯報單嘢,件事先揭發出嚟。仲話唔使好耐之後涉事嗰幾位堂友就已經即刻主動出嚟自首,噉沙宣紫Hall學生會覺得事態嚴重喎,咪好主動噉喺事件發生後嘅第二日就拉埋舍監同埋涉事人士9秒9衝去醫學院同班醫學院高層會面,主動交代事情,順便認錯認低威,扮下死狗道個歉。當然唔差在做戲做全套,沙宣紫Hall事後就負責交書面報告畀醫學院,然後涉事人士就負責交份道歉信畀醫學院同埋達安輝教授屋企人。

就噉嘅,沙宣紫Hall話涉事嗰兩位大仙事後真係深感懊悔,竟然自動放棄宿位,然後第二日已經迅速搬離舍堂作深切反省喎~但係「若要人不知,唔好太低B」,講完話放棄宿位,點知俾校園傳媒發現咗原來嗰兩位對於自己做過嘅事深感遺憾、覺得懊悔嘅舍堂大仙,竟然喺暑假搬離舍堂之後,Sem 2就火速搬返入去住。沙宣紫Hall就解釋話人哋兩個覺得放棄宿位一個學期之後發覺自己仲有住宿嘅需要,所以重新申請宿位。好神奇噉,佢哋個「收生建議小組」作咗個「綜合考慮」之後,就建議舍堂收返嗰兩個大仙。嗱~咁多位Freshman BB,呢度就係大家要學嘅手段啦!迎新做咗柒事唔緊要嘅,只要你知道咩叫「人誰無過,過而能改」,扮吓嘢quit咗間hall一個sem,噉一個sem之後咪又係一條好漢囉,真係善莫大焉啊哈利~

懷疑非禮事件 掩口唔畀再講

爆完一單又一單,舍堂醜聞呢家嘢真係唔講唔知身體好,一山還有一山高~以為塗鴉弔唁冊已經係考驗緊香大學生嘅智商水平,點知爆完大獲嘅幾日之後,竟然爆埋呢單迎新期間懷疑非禮事件。係啊~唔使估啦,都係沙宣紫Hall啊!又係事源於佢哋迎新個NightTrack,過緊活動嘅時候有一名男新生懷疑非禮另一名女新生。事發當刻男新生畀幾名女同學拉開訓斥,但係男新生嗰層樓啲人即刻走出嚟做「護主犬」,同嗰幾名女同學拗話人哋根本冇非禮佢。仲有報道話事發之後男新生所屬樓層嘅宿生竟然叫其他同學唔好再舊事重提,即刻掩口,當咩事都冇發生過。然後好似嗰件事之後,該名女新生就已經離開咗沙宣紫Hall,件事都不了了之咗。

懷疑非禮事件俾人爆咗出嚟之後嘅第二日,沙宣紫Hall即刻喺Facebook出咗篇聲明,話當初根本冇收到正式投訴,所以展開唔到調查。哦~「冇收到正式投訴」,當日咁多大仙隻眼都睇到,但係原來就係因為「冇收到正式投訴」,所以就可以明明知道件事嘅發生,但係都置諸不理!嗱~Freshman BB又學多樣啦,迎新真係唔難過,難在你點樣喺眾多舍堂柒事之中生存,首要條件除咗係識玩手段之外,仲要學識走「法律罅」~玩字眼呢啲嘢就梗㗎啦,但係玩到好似沙宣紫Hall咁出神入化就真係第一次見!唔寫個「服」字都唔得啊!

篇聲明最後仲提到話因為呢件事係傳聞,噉所以未得到任何證實之前,沙宣紫Hall學生會「懇請」大家停止喺網上面再討論相關事件,以免「對相關同學造成不必要嘅二次傷害」。就噉嘅,或者我有邏輯謬誤啦,其實若果冇傷害過任何人的話,根本無法構成「二次傷害」,噉如果你話會對相關同學造成「不必要嘅二次傷害」,姐係間接證明咗人哋已經受過傷害啦~仲要加句「懇請大家停止討論」,大佬你掩口掩到咁出面,我都幫你唔到喎~之後唔同嘅傳媒都去問過沙宣紫Hall究竟件事而家調查成點,佢哋嚟嚟去去都係話「我哋已經交咗畀舍監同埋校方跟進,由於事件已經進入調查,所以不方便透露詳情,若果有任何疑問麻煩去問香大嘅傳訊及公共事務處啦~」OK啊!香港市啲政府官員用開嘅招數都學到足,呢班舍堂大仙遲啲畢業都唔休冇工返啦,政府一定等住請佢哋啊!

難分真與假 人面多欺詐

兩單醜聞俾人爆咗出嚟之後,評議會就收到一名基本會員嘅投訴,希望評議會主席能夠就沙宣紫Hall兩單喺迎新期間發生嘅醜聞作出調查,仲話坊間媒體嘅報道搞到香大個朵臭咗晒,佢質疑點解沙宣紫Hall嘅迎新報告冇寫到呢兩單嘢落去,係唔係想瞞天過海就算。搞到評議會因為呢件事要開咗個第二次緊急會議去處理沙宣紫Hall嘅「蘇州屎」。最趣致個位係當日嘅緊急會議沙宣紫Hall 2017年嘅學生會幹事會差唔多全部嚟晒,但係明明知道嗰日係要審佢哋間Hall,佢哋竟然夠膽死每條問佢哋嘅問題都全體討論一次先答,最神奇嘅位係佢哋嗰對無辜嘅大眼睛,明明已經全班評議員啤住佢哋㗎啦,佢哋又真係好似班不畏強權同輿論壓力嘅支那人咁,可以當咩事都冇發生過。可能佢哋的確感覺到面前有班瞀里等住佢哋答問題,但係佢哋只不過當全部人係佢哋心理不斷逃避而產生出嚟嘅幻覺~

最好笑嘅係,佢哋去到評議會都竟然可以擘大眼講大話,個前外務副主席話已經將Cedars份迎新守則畀晒班迎新籌委會同新生睇。大佬啊,唔好咁癲啦,你明明知道在場嘅學苑總編係前沙宣紫Hall嘅堂友,仲要做過迎新OC,你都可以喺人哋面前講大話嘅?噉咪柒囉,當場俾人篤爆根本由始至終都冇show過份守則出嚟!真係「面係人哋畀,架係自己丟!」~呢種咁偏激嘅行為可能係佢哋對而家香港市咁封閉嘅共產社會作出嘅強烈而唏噓嘅控訴,禮儀之邦嚟㗎嘛,要呃到人先要呃到自己,舍堂教育咪就係教你呢啲嘢囉~唔係你估啊!

但係最吊詭嘅位係咩呢?佢哋當日喺評議會上面就話其實塗鴉弔唁冊件事係沙宣紫Hall堂友自己發現,然後自己主動同醫學院交待,噉姐係話其實醫學院根本冇發現件事,係佢哋自己良心過意唔去所以先要同醫學院認錯。真心,Freshman BB呢樣真係要學啦~當你哋一個睇唔開真係入咗Hall之後,做錯任何事,只要將自己放喺道德高地,噉樣就萬無一失,人哋都會即刻覺得你好慘慘豬~可惜緊急會議之後,即刻有傳媒報道話根本就唔係佢哋主動同醫學院講,而係明明佢哋知道件事,但係就冇同過醫學院交待,係第二日醫學院啲人發現咗之後要求沙宣紫Hall話如果唔交人就會報警處理。所以沙宣紫Hall先即刻戴返個頭盔,交個人出嚟保住自己堂友之餘當然最重要嘅係要保住自己間Hall嘅名聲啦~嗱!沙宣紫Hall就真係識do啦~舍堂教育教得好啊,分工又分得好,危機應變又做到足,又識應對傳媒,真係唔畀個like你都唔得!

秉持XGU嘅精神舍堂教育一日千里指日可待

最後嚟個大總結先,究竟點樣嘅Freshman BB先會得大仙鍾意呢?噉就梗係要識XGU四大精神啦,就係Discipline、Kindness、Loyalty同Maturity啊!

所謂Discipline就當然係要有紀律啦,點可以唔聽大仙講就亂咁將舍堂啲內幕爆晒出去㗎姐?嗱~冇啲Discipline咪搞到好似而家噉囉,本來兩單醜聞都冇人知㗎,但係就係因為間Hall入面有人唔識Discipline,搞到而家個朵臭晒啦!係咪衰啊~

至於Kindness啦喎,就係教你遇到唔同情況之下點樣去面對街外人,人哋講你間Hall唔緊要,你只要識得扮個樣,chok個nice tone出嚟,啲人就即刻會覺得你冇錯,錯就錯在佢哋影響你哋舍堂文化,搞到你哋好事不出門,醜事傳千里!

仲有啊,Freshman BB要記住,其實點樣先會得人鍾意呢,無論喺言語定係行為間都要落好大嘅功夫。除咗識擦鞋之餘,就當然係要聽大仙嘅說話,佢哋叫你做咩你就做咩啦!Loyalty啊嘛~你唔Loyal to間Hall,噉你點樣喺裡面生存啊?

其實舍堂呢幾年發展得一日千里唔係冇原因㗎,佢哋為咗提升堂友嘅質素,任何事情都會識包庇同狡辯,最厲害嘅係佢識掉轉槍頭,話返指控佢嘅人先係錯嗰個,呢下先犀利啊。你講嘅嘢唔啱佢心水,就同你講「我對你好失望啊」!我聽完真係得啖笑~但係而家我明㗎啦!其實一直以嚟都係我哋呢班冇住Hall嘅配合唔到你哋嚴謹嘅人生態度,我哋嘲笑你就簡直係對你哋嘅舍堂文化作出侮辱啊!

或者其實佢哋知道噉樣做係錯嘅,但係反而從佢哋一系列冇經大腦就做嘅行為,我哋可以睇到噉樣係一種無意識嘅行為革命,或者佢哋就係想背叛世俗、抵制嗰班針對佢哋嘅人啦!但係其實佢哋嗰種情不自禁將自己放喺道德高地嘅行為,就正正諷刺緊呢個城市有好多政策都係一意孤行嘅。或者會唔會佢哋先係香大裡面最mature嗰班,我諗冇佢哋香大都攞唔到「最高學府」呢個頭銜啊!

果然舍堂界真係一個珍貴嘅正面教材,每當我對未來感到迷惘同沮喪,唔知道應該點樣繼續走落去嘅時候,我都會回憶一下自己以前住Hall嘅日子,回味返究竟點樣先能夠做到一個令人喜愛嘅Freshman BB~人哋話住Hall就好似率先體驗出社會搵食嘅日子,呢句真啊!人窮志不窮,做人唔可以俾人睇死,就算舍堂有醜聞又點姐,「我思故我在」,只要舍堂界一直秉持住XGU嘅精神,就可以將苟延殘喘嘅XGU起死回生,等香港市嘅市民仲記得有呢間咁離地,咁遺世獨立嘅大學存在啊嘛~

盡快入Hall

 

愛你嘅Current

 

下一則
上一則
2018 年 07 月 30 日

關於作者

學苑編輯委員會